Abaakafa Ebola baweze
18Jul 30, 2012
Omu ku bajjanjaba aba Ebola nga yeesabise.
Kampala
Bya Ismael Kasooha
ABANTU abaakafa obulwadde bwa Ebola obwabaluseewo mu Disitulikiti y’e Kibaale baweze 18 oluvannyuma lw’okunoonyereza kw’abasawo.
Mu kusooka, kyategeezeddwa nti abantu 14 be baakafa obulwadde buno, kyokka kyazuuliddwa nti waliwo abantu abalala bana abaafudde mu bitundu eby’enjawulo abaabadde n’obubonero bwonna obw’obulwadde bwa Ebola.
Abalwadde b’obulwadde obulala mu ddwaaliro ly’e Kagadi badduse ne bava ku bitanda nga batya okukwatibwa Ebola ne bategeeza nti obujjanjabi bajja kubufunira mu maka gaabwe.
Mu ddwaaliro e Kagadi wakuumirwayo abalwadde ba Ebola mukaaga abaamaze okukeberebwa ne kikakasibwa nti babulina kyokka ng’abasawo baasattidde omu ku balwadde ba Ebola bwe yeemuludde n’adduka mu ddwaaliro nga baataddeko abantu okumunoonya wabula nga we bwazibidde yabadde tannalabika.
Dr. David Mukome eyalondeddwa okulabirira enzijanjaba y’ekirwadde kya Ebola mu ddwaaliro e Kagadi yategeezezza nti kati ekizibu kye bafunye ly’eddagala eribaweddeko n’ebikozesebwa ng’okwesabika n’ebirala okubakenderako.
Obulwadde buno bweyongedde okusaasaana mu magombolola mangi mu Kibaale era wateereddwawo ttiimu y’abajjanjabi abasindikiddwa mu byalo okukung’aanya abantu abalina obubonero bwa Ebola nga babaleeta mu ddwaaliro okwongera okukeberebwa n’okujjanjabwa.
