The Passing Of Nnalinnya Nakabiri Elizabeth

‘Emikolo egyakoleddwa ku Nakabiri gyasobye’
Aug 06, 2012

Kampala

Bya MUSASI WA BUKEDDE
SSAABALANGIRA Ying. Moses Kayima Ssegamwenge agambye nti emikolo egyakoleddwa mu kubikka akabugo ku Bannalinnya Elizabeth Nakabiri ne Edith Nabweteme abaaterekeddwa mu masiro e Kasubi gyakuddibwamu kubanga abaagikoze si be batuufu.

Yannyonnyodde nti Nnaalinnya Nakabiri yalaama Omumbejja ow’okumusikira mu musaayi atwale n’obwannaalinnya. Mu kiseera we yazaamidde nga taliiwo kwe kulonda omulala Nanjobe wabula ekiseera ky’okubikka akabugo we kyatuukidde n’alemesebwa okukola omukolo gw’okubikka akabugo.
“Obukulembeze oba obwami buwooma kituufu. Nze nsaba abakwatibwako mu kika ne bampa Nnaalinnya ne mmulaga ekika, kye twakoze e Kasubi. Wabula kyanneewuunyisa ekiseera ky’okubikka akabugo bwe kyatuuse, ate Diana Teyeggala ye yakikoze, ekintu ekikyamu! Emikolo tulina okugiddamu,” Ssaabalangira bwe yannyonnyodde.

Waabaddewo okusikaasikana mu kubikka akabugo ku Nnalinnya Elzabeth Nakabiri bwe baatudde mu Kigango ne balonda Omumbejja Nanjobe wabula nga bateekateeka okukola omukolo ate Omumbejja Diana Teyeggala n’awamba olubugo ng’alusika ku mulala eyabadde alukutte era ye yabisse kye bawakanya nti yakikoze mu bukyamu.
Akavuyo ku mikolo gy’okuziika Nnaalinnya Edith Nabweteme Kiyumba kwatandise na kusika muguwa ku lutikko e Namirembe ng’okusaba kuwedde. Abamu baali bagamba nti bagende Kasubi bakole emikolo, abalala nga bagamba nti balina kugenda ku Lubiri lwa Ssekabaka Kamaanya e Kasengejje.

Olwavudde e Namirembe baavuze bagenda Kasengejje ne bakola emikolo sso nga mukyala wa Dr. Lubega gwe bagamba nti Nnaalinnya Nabweteme gwe yali yalaamira okumusikira baamukuumidde Kasubi nga bamukakasizza nti emokolo gyonna we bagenda okugikolera.
Olwakomyewo e Kasubi we baakamutemedde nti emikolo giwedde naye nga teboogera ani abisse kabugo. Ssaabalangira Kayima yagambye nti akimanyi eyabisse akabugo mumbejja naye abadde tamumanyi nnyo nga tatera kujja mu mikolo.

Abamanyi ennono egobererwa baategeezezza nti omusika ng’abikka akabugo ku Nnaalinnya ayinza okuyambibwako jjajjaawe singa olubugo luba lugazi nnyo kyokka mu kubikka ku Nnaalinnya Nakabiri abaakwata olubugo baali basatu n’okusingawo. Ku nsonga eno, Nnaalinnya w’Amasiro g’e Kasubi Getrude Tebattagwabwe yategeezezzanti naye yabadde tategedde ani yabisse kabugo wabula n’atusaba tugumiikirize essaawa yonna bajja kumututegeeza.

Mu kiseera kye kimu, Paasita Micheal Kyazze yagobye Omugiriinya ku ntaana ya Nnaalinnya Nakabiri ng’amugamba nti tayagala ateeke kasiya mu ntaana ya nnyina sso ng’Omugirinnya y’akola emikolo ku Balangira n’Abambejja ababeera bazaamye.